بابكر سلك يكتب: مابين بحر دار و(عروس الرمال)
*طالما تمت إجازة (قلعة شيكان) من (الكاف).
*مافي أي سبب بلعبنا كورة الأرض تمهيدياً في أية حتة خارج الوطن.
*وده لإعتبارات صالح المريخ.
*المريخ داير شنو من المباراة غير إعلان التأهل؟.
*طيب إعلان التأهل ده بيابا تلتين مليار كااااش معاهو كمان؟.
*بالتأكيد ما بيابا.
*يبقى مجرد المقارنة بين بحر دار و(عروس الرمال) غير موجودة.
*بالأبيض سيجد المريخ الدعم الجماهيري المطلوب.
*ممكن الجماهير البتجي تخلع الجيبوتيين ذاتهم.
*لأن عدد الجماهير داخل الاستاد سيفوق عدد المواطنين في جيبوتي.
*وخلعة ساي الجمهور عندو قونين.
*ضف إلى ذلك.
*الجمهور ده بدفع أقل من تلتين مليار؟.
*دحين التلتين مليار مامحتاج ليها ناد يتولى الصرف عليه زول وااااحد بس؟.
*أيوه زول.
*وزول واحد كمان.
*عشان كدة بحر دار دي مفروض تكون بره الحسابات.
*وعلينا أن نوجه المعركة(لغابة) شيكان لنضمن التأهل والكاش.
*المهم.
*أمس في المباراة التجريبية استعجل الناس كعادتهم الأحكام.
*ناس طلعوا المحترفين خرافيين.
*وناس قالوا المحترفين فيهم،طرف قدر جبرة ورأس حربة دفعة الغرايري.
*وطبعاً الحكم في هذا المرحلة لايكون إلا لشيء في نفس يعقوب.
*وما أكتر اليعقوباب في مجتمع المريخ اليوم.
*أيها الناس.
*الناس الفي الكشف ديل ياهم أسلحتنا.
*يجب أن نهتم بها ونعتز بها ونرفع من درجة إعدادها لأننا سنخوض بها المعركة.
*المهم .
*منتخبنا تحت سبعطاشر أبهر،الناس.
*نعم .
*تحت سبعطاشر.
*ولاتعليق أكتر من حبوبة لاعب منهم شافتو في التلفزيون وسمعت المذيع قال تحت سبعطاشر.
*قالت أجي!!!!!
*أجي شنو يا حاجة.
*أنتي بتعرفي أكتر من الحكومة؟.
*أيها الناس.
*إن تنصروا الله ينصركم.
*أها .
*نجي لي شمارات والي الخرتوم.
*كان شفت يا والينا .
*نزوغ من بواعيضك تغمتنا ضبابينا.
*نزوغ من ضبابينا تقوم الكهربا تقطع فينا.
*نستحمل قطعة الكهربا يا والينا .
*نفتح الماسورة الموية ماتجينا .
*في شنو الماهية والحرس والسارينا؟.
سلك كهربا
ننساك كيف والكلب قال في البلد دي بالطريقة دي عااادي ممكن نزوغ من الضبان الأسد يلم فينا….غابة يا أخينا.
وإلى لقاء
سلك
صحيفة الانتباهة
مصدر الخبر
