بابكر سلك يكتب.. هو الهلال ذاتو برلوم المريخ.
[ad_1]
*الحبيب محمد عبد الماجد استنكر في زاويته المحبوبة قصة برلمة مجلس الهلال.
*استنكر ذلك لدرجة أنسته ثوريته ومعاها مدح كمان.
*يقول محمد عبدالماجد في وصفه للسوباط والعليقي.
*ناس البترول ديل ماعندهم جودية.
*أكسح وأمسح وأفسخ بس.
*حتى عبارة المدح هي إحدى شعارات أحمد هرون.
*من أول وهلة ماصدقت أنو الكلام القدامي ده كتبوا محمد الثورجي.
*قلت يمكن كلام زول شوربجي(بتاع شوربة).
*فسلوك الثورة وقناعاتها لايمكن أن تسمح لثورجي أن يمتدح ثورة مضادة أو مضاد حيوي.
*ناس البترول ديل ياحمودي خلي طابقهم مستور وخليهم في بترولهم(إذا حقهم) أو إذا(حق غيرهم وأسمي مكتوب).
*نرجع لموضوعنا.
*السوباط برلمتو مافيها شك.
*من بترولو ولرئاسة نادي الهلال.
*لاخبرة ولا أظنو كان وقتها يعلم الهلال فيها كم لام.
*وكتاااار الزيو في مجلس الهلال.
*وللأمانة كتااار زيو على قمة الهرم الإداري الرياضي.
*يعني برلوم وسط الجماعة عرس.
*،الحبيب محمد زعل من برلمة مجلس الهلال.
*طيب تعال جاي.
*الهلال ذاتو برلوم المريخ لليوم.
*النشاة.
*السينير المريخ والهلال برلوم.
*وفي النشاة دي.
*الهلال برلوم بري ذاتها.
*فبري إذا قابلت الهلال بتملصو لأنها هي سينير الشعار والهلال.
*والهلال برلومها.
*يعني في النشأة الهلال برلوم برلوم المريخ.
*في الاستادات.
*استادكم الخالعكم(اللهم أجعله في ميزان حسناتها وفك أسرها وأستر سرها).
*استادكم ده برلوم استادنا.
*شوف نحنا شيدنا متين وأنتوا شيدتوا متين ونحنا إفتتحنا متين وأنتوا إفتتحتوا بالدين متين؟.
*برالمة استادياً برضو.
*إفريقياً.
*نحنا قبل تلاتة وتلتين سنة إتخرجنا .
*فارقنا مدرسة الأندية غير الحائزة على بطولة من بطولات (الكاف).
*ودخلنا جامعة الأندية المتحكرة على لوح الشرف الإفريقي بفضل حيازتها لبطولة من بطولات (الكاف)
*وإنتوا لي أسي في الأساس زيرو كبير.
*في دي برالمة أنتوا وسناير نحنا،ولا دي ماسمعوا بيها ناسك ناس(البترول ).
*ياخ في دي.
*كردنة عندو (فيديو) حايم
*(فيديو أوسكار).
*للرائع وليد أبو هجمةز
*مونتاج من لقاء مع كردنة على شاشة البلد.
*قال قناة الهلال قال.
*كردنة فات.
*وقفل الملفات.
*والقناة رجعت لي سيدها.
*ناس البترول ديل البترول شغلهم عن إطلاق قناة لنادي البترول ولا شنو؟.
*كلموا الشيخة بتعملها ليكم.
*ياخ مرة البر والإحسان دي عملت ليكم استاد بي فندقو ماتعمل ليكم قناة.
*القناة طبعاً حاتكون كلها أكسح أمسح وإعلانات محطات بنزين.
*وأغنياتها البابور جاز خلو الإشتغل لما لجنة التمكين تعود يا أبوحميد.
*أوعه ناس البترول المابفتشوا لي جودية.
*يرجعوا يكوسوها يابسة.
*ده تبقى مشكلة يا أبو حميد.
*محمد عبدالماجد رجل ثوري مابتغالطو في دي نفرين.
*ولثوريته هذه إحترامها عند الكثير من جماهير المريخ.
*ومقدرنها ليهو.
*بس كوصية.
*إذا تعارضت الهلالية مع الثورة.
*أخير ليك الثورة فهي أقرب للقلوب.
*فالوطن أولى ثم تأتي بقية الإنتماءات.
*المهم.
*(الفيديو) بتاع كردنة العملو وليد أبو هجمة روعة.
*كردنة قال إعترضت على الإحتفال بمرور تسعين سنة على تأسيس الهلال.
*لأنو ماممكن نادي تسعين سنة ماشال كاس ويحتفل.
*نحتفل بي شنو؟.
*طبعاً كردنة لو لقى في دولاب الهلال مانديلا.
*كان قفل وإحتفل وحتاهو مع بشة في دائرة السنتر.
*لكنه وجد العنكبوت الذي يدل على البرلمة.
*ياخ سيكافات عندنا مجدعات زي الركشات.
*وأنتوا يا محمد في بترولكم الركشة تسمكم.
*تقول لي مابرالمة.
*برالمة وزيرو كبير كمان.
*دفعت مريم بتي.
*السنة دي ماشة زيرو كبير.
*برلومة زي الهلال.
*مازي العجب.
*العجب ده بلعب في نادي سينير.
*أسي في أي محفل رياضي.
*يحق ليكم في التعريف.
*تقدمونا بقولكم.
*المريخ.
*سينيرنا.
*صدقوني إفريقيا كدة بتحترمكم.
*لأنو سينيركم عضو لوح الشرف الإفريقي.
*ولكي تعم الفائدة.
*نحنا كسناير نشرح لبرلومنا معنى لوح الشرف. الإفريقي لأنهم برالمة لاشافوهوا ولا إتكتبوا عليهو .
*لوح الشرف الإفريقي ده يابرالمتنا.
*لوح كبيييييير.
*وعاااااالي.
*بكتبوا فيهو بالدهب.
*طبعاً بالدهب مابتكتب نادي ضهب.
*بكتبوا فيهو الأندية السناير الشالت بطولة من بطولات (الكاف).
*الهلال برلومنا حقو مايحرجنا ويسألنا أنا أسمي مكتوب؟.
*طبعاً مامكتوب.
*كردنة قال لقى الديار خلا.
*كاس مافيها .
*بيت أنصار سنة بس.
*ولا كاس.
*وقع ليكم يابرالمة؟.
*المهم.
*كورسات تقوية لطلاب زيرو كبير.
*الفرص محدودة.
*سجل برلومك حتى لاتفوتك الفرصة.
*وسجلنا برلومنا .
*لاشكر على واجب يامحمد عبدالماجد.
*أيها الناس.
*إن تنصروا الله ينصركم.
*أها.
*نجي لي شمارات والي الخرتوم.
*كان شفت ياوالينا.
*البرالمة دايرين يتطاولوا علينا.
*وكردنة قال لما جينا .
*الترابة مالقينا.
*خجلانين خجلانين خجلانينا.
سلك كهربا
ننساك كيف والكلب قال عندي جريو كلما نجي جمب البرلوم مول يقول نادي الهلال نادي الهلال …ماعارف العلاقة شنو؟.
وإلى لقاء.
سلك
صحيفة الانتباهة
[ad_2]
مصدر الخبر
