مافي جيش في الدنيا بيدخل معركة وبيرفض التفاوض – النيلين

لو في مجرم شايل ليهو مسدس صغير و احتجز ليهو رهائن في بيت و دارت بينه و بين الشرطة معركة قصيرة او طويلة ح نلقى انو في مرحلة من المراحل الشرطة بتدخل مع المجرم في تفاوض .. رغم انو الشرطة بتكون في موقع قوة لكن لابد من التفاوض من ناحية قانونية و من ناحية تكتيكية ..

ما مفروض الناس تشغل بالها بموضوع التفاوض .. التفاوض إجراء طبيعي في اي معركة في الدنيا دي .. مافي جيش في الدنيا بيدخل معركة وبيرفض التفاوض .. الحنك في نتيجة التفاوض.. التفاوض مرحلة قانونية قبل ما تكون تكتيكية ..

إحنا ثقتنا في قواتنا المسلحة بلا حدود .. و طالما إحنا داعمين جيشنا و واقفين خلفه يبقى ندعمه في كل خياراته و خطواته .. يفاوض .. يطير السماء .. إحنا داعمين داعمين .. في يوم من الايام الناس مشت وراء تجمع وهمي ما معروفة قيادته و قالوا لو تجمع المهنيين قال بكرة صيام ح نصوم .. فكيف بالله عليكم ما ندعم مؤسسة قواتنا المسلحة في كل خطواتها .. الجيش لو قال نفاوض بنفاوض و لو قال بل بس ح نقول بل بل بل و لو قال بكره صيام ح نصوم

نزار العقيلي